រថយន្ត៣គ្រឿងមិនស្គាល់អត្តសញ្ញាណប្រើកាំភ្លើងប្រដេញតាមឃាត់រថយន្តជនជាតិវៀតណាមទាំងយប់អាធ្រាត្រធ្វើឲ្យរថយន្តវៀតណាមនោះក្រឡាប់ទៅម្ខាងផ្លូវ
ក្រុងបាវិតខេត្តស្វាយរៀង :បើយោងតាមវីដេអូរបស់អ្នកសារព័ត៌មានដែលធ្វើការថតបានទាំងយប់អាធ្រាតអំពីទិដ្ឋភាពមួយដែលកើតឡើងនៅចំណុចទីតាំងភូមិសាស្ត្រព្រំដែនកម្ពុជាវៀតណាមស្ថិតនៅក្បែរច្រក់កំពង់ស្ពាន ក្រុងបាវិត ខេត្តស្វាយរៀង កាលពីយប់ម៉ោងប៉ុន្មានជាង១០នាថ្ងៃទី ៤ ខែធ្នូ ឆ្នាំ ២០២៤
នៅក្នុងករណីហេតុការណ៍មានរថយន្តម៉ាក់ព្រូស ដែលមានស្លាកលេខ2BK 2435 .បានក្រឡាប់ទៅម្ខាងផ្លូវជាហេតុធ្វើអោយរថយន្តមានការខូចខាតមួយចំនួន ចំណែកមនុស្សជិះក្នុងឡានពីរនាក់ម្នាក់ជាជនជាតិវៀតណាម និងម្នាក់ទៀតជនជាតិជាអ្នកបើកបររថយន្តមិនទទួលរងគ្រោះថ្នាក់ធ្ងន់ធ្ងរនោះទេ។
ជាក់ស្តែងតាមសម្ដីរបស់អ្នកបើកបររថយន្តនោះបានលើកឡើង និងប្រាប់ដល់អ្នកសារព័ត៌មានថា មុនកើតហេតុពួកគេបានធ្វើដំណើរតាមបណ្ដោយផ្លូវព្រំដែននេះ ស្រាប់តែមកដល់ចំណុចមួយនៅក្នុងភូមិសាស្ត្រខាងលើនេះដែរក៏មានរថយន្ត ៣គ្រឿងធ្វើការឃាត់ស្ទាក់ពួកគេមិនដឹងក្នុងគោលបំណងអ្វី ខណៈពេលនោះអ្នកបើករថយន្តដែលធ្វើដំណើរជាមួយជនជាតិវៀតណាមក៏ធ្វើការបើកសម្រុកយ៉ាងលឿនដោយកាច់ចង្កូតមិនទាន់ក៏ត្រូវក្រឡាប់ទាំងយប់ ចំណែកឯរថយន្ត ៣គ្រឿងដែលមានម៉ាកដូចជា
ម៉ាកHighLanderម៉ាកAlphade ជាដើមដែលបានធ្វើការដេញនោះក៏បើកទៅមុខបោះពួយយ៉ាងលឿនផងដែរដោយមិនរង់ចាំមើលរថយន្តក្រឡាប់នេះ ស្របពេលជាមួយគ្នានោះដែរម្ចាស់រថយន្តដែលបានជួបគ្រោះថ្នាក់នេះក៏ធ្វើការនាំគ្នាទាញរថយន្តដាក់នៅលើផ្លូវដើម្បីធ្វើដំណើរបន្តដោយមិនមានសមត្ថកិច្ចមកដល់ដើម្បីធ្វើការសាកសួរនោះឡើយ ខណៈមានអ្នកសារព័ត៌មានចូលទៅដល់ធ្វើការថតនិងផ្ដិតទិដ្ឋភាពអំពីគ្រោះថ្នាក់ចរាចរណ៍ដល់រន្ធត់មួយនេះ។
សូមបញ្ជាក់ផងដែរថាជុំវិញករណីនៃការជម្រាបដំណឹងរបស់ម្ចាស់រថយន្តដែលបានគ្រោះថ្នាក់នោះគឺសាធារណៈជនទូទៅសូមឱ្យអាជ្ញាធរសមត្ថកិច្ចក្រុងបាវិតលោក អែម សុវណ្ណារិទ្ធ និងឯកឧត្តម ពេជ្រ វីរះ ស្នងការនគរបាលខេត្តស្វាយរៀង ធ្វើការស្រាវជ្រាវ និងសាកសួរដើម្បីការពារនូវសុវត្ថិភាពជូនដល់ប្រជាពលរដ្ឋនៅក្នុងតំបន់ចៀសវាងបញ្ហាដែលកើតឡើងដោយប្រកាន់ណាមួយនៅថ្ងៃខាងមុខ។
សូមជម្រាបផងដែរថាទីក្រុងបាវិតគឺជាកន្លែងដែលមានភ្ញៀវទេសចរណ៍ចម្រុះសាសន៍កំពុងប្រកបមុខរបររកស៊ី និងធ្វើការតាមមុខជំនួយផ្សេងៗ។
ជុំវិញព័ត៌មាននៃគ្រោះថ្នាក់ចរាចរណ៍ខាងលើនេះសារព័ត៌មានរបស់យើងពុំទាន់ទទួលបានការបញ្ជាក់ពីសមត្ថកិច្ចចរាចរណ៍ក៏ដូចជាអាជ្ញាធរពាក់ព័ន្ធក្នុងក្រុងបាវិត ខេត្តស្វាយរៀង បាននៅឡើយទេ។
សារព័ត៌មានរបស់យើងរង់ចាំទទួលព័ត៌មានធ្វើការចុះផ្សាយជាបន្តបន្ទាប់បន្ថែមទៀតប្រសិនបើមានប្រភព។
រាល់ការចុះផ្សាយរបស់សារព័ត៌មានយើងធ្វើការផ្ដល់ដំណឹងជូនដល់ថ្នាក់ដឹកនាំខេត្តក្រុងរាជធានី និងសាធារណៈជនទូទៅបានដឹងដើម្បីចូលរួមក្នុងសង្គមជុំវិញប្រភពព័ត៌មានដែលបានផ្ដល់ជូនក្នុងគោលបំណងចូលរួមអភិវឌ្ឍន៍ប្រទេសជាតិ សូមអរគុណ។
