សាធារណជនសូមអរគុណចំពោះសមត្ថកិច្ចដែលឃាត់បានឧក្រិដ្ឋជនដែលបានបាញ់ប្រហារអ្នកសារព័ត៌មាន តែក៏មានការស្នើសុំឲ្យអនុវត្តនៅគោលការណ៍របស់ក្រសួងមហាផ្ទៃដាក់ជូនទាំង៧ ចំណុចនៅក្នុងភូមិសាស្ត្រដើម្បីសុវត្ថិភាពពលរដ្ឋទូទៅផងដែរ
ខេត្តសៀមរាប :តាមប្រភពព័ត៌មាននៃស្នងការដ្ឋាននគរបាលខេត្តសៀមរាប នៅថ្ងៃទី ៥ ខែធ្នូឆ្នាំ នេះផងដែរថា មានការឃាត់ចាប់ខ្លួនជនដៃដល់ដែលជាខ្មាន់កាំភ្លើងដែលបានបាញ់ប្រហារទៅលើអ្នកសារព័ត៌មានម្នាក់ឈ្មោះថា ឈៀង ឈឹង កាលពីយប់ម្សិលមិញនាថ្ងៃទី ៤ ខែធ្នូ ឆ្នាំ២០២៤។
ជនដៃដល់នោះត្រូវបានឃាត់ចាប់ខ្លួនបានដោយស្នងការដ្ឋាននគរបាលខេត្តសៀមរាបហើយពេលនេះរដ្ឋបាលខេត្តក្រោមការដឹកនាំដោយលោក ប្រាក់ សោភ័ណ ជាអភិបាលខេត្តសៀមរាបក៏បានប្រកាសដំណឹងតាមរយៈផេកផ្លូវការរបស់រដ្ឋបាលខេត្តដែលមានខ្លឹមសារដូចតទៅ
រដ្ឋបាលខេត្តសៀមរាបសូមប្រកាសព័ត៌មានអំពីករណី ប៉ុនប៉ងមនុស្សឃាតពីជនមិនស្គាល់អត្តសញ្ញាណបានលប លួចបាញ់មួយគ្រាប់ ដោយប្រើប្រាស់អាវុធកែច្នៃទៅលើឈ្មោះ ឈឿង ឈឹង ភេទប្រុស អាយុ ៦៣ឆ្នាំ មុខរបរ ជាអ្នកយកព័ត៌មាន កាលពីថ្ងៃទី៤ ខែធ្នូ ឆ្នាំ២០២៤ វេលាម៉ោង ១៨៖០០នាទីយប់ នៅក្នុងភូមិសាស្រ្ត ឃុំពង្រលើ ស្រុកជីក្រែង ខេត្តសៀមរាប។
រដ្ឋបាលខេត្ត សូមបញ្ជាក់ជូនថា ពាក់ព័ន្ធនឹងករណីខាងលើនេះអាជ្ញាធរពាក់ព័ន្ធ ក៏ដូចជា កងកម្លាំនគរបាល នៃ អធិការដ្ឋាននគរបាល ស្រុកជីក្រែង បានធ្វើការស្រាវជ្រាវរហូតឈានដល់កំណត់មុខសញ្ញា និង ធ្វើការ ឃាត់ខ្លួន ជន សង្ស័យមកធ្វើការសាកសួរព័ត៌មានបន្ថែម អំពី ករណី ប៉ុនប៉ងឃាតមនុស្សឃាត ដោយចេតនា និង ទទួលបាន ចម្លើយសារភាពពីជនសង្ស័យ គឺដោយសារទំនាស់បុគ្គល។
គ្រួសារជនរងគ្រោះក៏ដូចជាប្រជាពលរដ្ឋទូទៅដែលរស់នៅក្នុងតំបន់ភូមិសាស្ត្រនៅស្រុកជីក្រែង និងទីតាំងមួយចំនួនទៀតក្នុងខេត្តសៀមរាប ក៏បានសូមថ្លែងអំណរគុណចំពោះលោកគ្រូពេទ្យអ្នកគ្រូពេទ្យដែលបានធ្វើការសង្គ្រោះជាបន្ទាន់ និងសូមអរគុណបន្ថែមទៀតចំពោះចំពោះអាជ្ញាធរសមត្ថកិច្ចមានការឃាត់ខ្លួនជនដៃដល់ទាំងការប្រើពេលវេលាមិនបាន៤៨ម៉ោងផងដើម្បីផ្ដន្ទាទោសតាមច្បាប់ជាធរមាន។
ហើយក៏សូមឱ្យពង្រឹងនៅការការពារបន្ថែមជូនដល់សាធារណជនជាប្រជាពលរដ្ឋដែលកំពុងតែរស់នៅក្នុងខេត្តសៀម ជាពិសេសភ្ញៀវទេសចរណ៍ជាតិនិងអន្តរជាតិដែលកំពុងតែទៅទស្សនានៅក្នុងតំបន់អច្ឆរីយអង្គរវត្តជាដួងព្រលឹងជាតិខ្មែរទាំងអស់គ្នា។
សារព័ត៌មានរបស់យើងនឹងបន្តធ្វើការចុះផ្សាយជាបន្តបន្ទាប់ទៀតប្រសិនបើមានប្រភពពាក់ព័ន្ធផ្ដល់ដំណឹងជូនដើម្បីធ្វើការងារចូលរួមជាមួយនិងការផ្ដល់ដំណឹងជូនដល់រាជរដ្ឋាភិបាលក៏ដូចជាសាធារណៈជនទូទៅក្នុងប្រទេសកម្ពុជា។
