ការដ្ឋានទំនប់ទឹកប្រៃចម្ការលើឃុំថ្មសនឹងអាចជាការនាំប្រយោជន៍ដល់ប្រជាពលរដ្ឋពិតប្រាកដឬក៏គ្រាន់តែជាឱកាសព័ទ្ធដីចែកគ្នាទៅវិញ?
ខេត្តកោះកុង : សាធារណៈជនក៏ដូចជាប្រជាពលរដ្ឋទូទៅកំពុងមានការចាប់អារម្មណ៍ចំពោះការសាងសង់ការដ្ឋានទំនប់ទឹកប្រៃចំការលើ ដែលជាហេតុផ្ទុះការបែកធ្លាយព័ត៌មានពីមាត់មួយទៅមាត់មួយដោយមិនប្រក្រតីគឺអាចនាំឲ្យមានការបាត់បង់ដីមួយផ្នែកធំរបស់ជម្រកព្រៃកោងកាងជាប់ដែនដៃមាត់សមុទ្រឃុំថ្មស និងជាការបំពានលើគោលការណ៍របស់រាជរដ្ឋាភិបាលផងដែរ។
បើយោងតាមសេចក្តីជូនដំណឹងរបស់ក្រសួងធនធានទឹក ដឹងឧតុនិយមចុះថ្ងៃ៥ ខែកុម្ភៈឆ្នាំ២០២៥ លេខ ៤០៣ ដែលបានជម្រាបដំណឹងជូនលោកជំទាវអភិបាលនៃ គណអភិបាលខេត្តកោះកុងដីពីកម្មវត្ថុ សំណើសុំកិច្ចសហការបើកដំណើរការ ការដ្ឋានចំនួនពីរកន្លែងនៅក្នុងខេត្តកោះកុង។ហើយបើកដំណើរការដ្ឋានប្រព្រឹត្តទៅចាប់ពីថ្ងៃទី ៧ ខែកុម្ភៈឆ្នាំ២០២៥ ក្នុងលក់ក្នុងនោះរួមមាន
ទី១ ការដ្ឋានជួសជុលទំនប់អាងទឹកជ្រោយប្រស់ទី២ និងសាងសង់សំណង់សិល្បការ្យ(ជំហ៊ាន២)ស្ថិតនៅក្នុងឃុំជ្រោយប្រស់ ស្រុកកោះកុង ខេត្តកោះកុង
ទី២ ការដ្ឋានជួសជុលទំនប់ការពារទឹកប្រៃចំការលើ(ជំហាន១)ស្ថិតនៅឃុំថ្មស ស្រុកបទុមសាគរ ខេត្តកោះកុង។
ជុំវិញទិដ្ឋភាពទាំងអស់នេះស្ថាប័នអង្គភាពសារព័ត៌មានក៏បានធ្វើការចុះដល់ទីតាំងក្នុងតំបន់នោះបន្ទាប់មកក៏ទំនាក់ទំនងទៅលោក តេង ហាន់ ប្រធានសហគមន៍ថ្មស ដើម្បីឲ្យលោកបញ្ជាក់អំពីការចាក់ដីរំលោភលើមាត់ដៃសមុទ្រ ឲ្យក្នុងនាមលោកជាប្រធានសហគមន៍ ហើយលោកបាននិយាយថាផ្លូវនេះគឺខាងធនធានទឹកខេត្តជាអ្នកចាក់ ហើយលោកឱ្យទាក់ទងទៅធនធានទឹកទៅ សារព័ត៌មានរបស់លើយើងក៏សូមឱ្យលោកជួយបញ្ជាក់បន្ថែមទៀតថាតើផ្លូវនេះគម្រោងធ្វើអីដែរ? លោក តេង ហាន់ បាននិយាយថាលោកមិនអាចនិយាយបានទេ លោកឱ្យតេទៅធនធានទឹកទៅ ហើយលោកបញ្ជាក់ទៀតថាមិនមែនជាឯកជនជាអ្នកធ្វើទេ ឬក៏សាកសួរទៅឃុំទៅ ដោយលោកគ្រាន់តែពិនិត្យមើលខ្លាចវាប៉ះពាល់ព្រៃកោងកាងដែលជាដីសហគមន៍តែប៉ុណ្ណោះ។
សារព័ត៌មានរបស់យើងក៏ធ្វើការជួបផ្ទាល់ជាមួយលោក លោក អិក កួន មេឃុំថ្មស ដើម្បីចង់ឱ្យមានការធ្វើការបញ្ជាក់ឲ្យច្បាស់បន្ថែម ជុំវិញការព័ទ្ធក្រវ៉ាតព្រុំទំនប់ទឹកប្រៃនោះ លោកមេឃុំបានប្រាប់ថាកន្លងមកប្រជាពលរដ្ឋរបស់លោកនៅក្នុងឃុំចង់ឱ្យមានទឹកសាបប្រើប្រាស់សម្រាប់ដំណាំស្រូវឬដំណាំចំការរបស់ប្រជាពលរដ្ឋ ដោយមានការសំណូមពរជាយូរខែឆ្នាំមកហើយ ហើយគម្រោងនេះដែលចំណាយថវិការរបស់រដ្ឋអស់ប្រមាណរាប់ពាន់ម៉ឺនលានរៀល និងចំណាយពេលវេលាយ៉ាងតិចក្រោមបួនឆ្នាំដើម្បីសាងសង់ឲ្យហើយរួចរាល់។ជាងនេះទៅទៀតលោកទទួលស្គាល់មានបុគ្គលខ្លះធ្វើការចាក់ដីរំលោភបំពានមែន។
សារព័ត៌មានរបស់យើងក៏បានធ្វើការសួរបន្ថែមជុំវិញរឿងនេះចំពោះលោក ក្រូច បុរី សីហា អភិបាលស្រុកបូទុមសាគរ ដើម្បីឲ្យលោកបញ្ជាក់បន្ថែមតែចំពេលលោកកំពុងជាប់រវល់ប្រជុំបក្សកាលពីថ្ងៃអាទិត្យ ទី៩ ខែកុម្ភះ ឆ្នាំ២០២៥ មិនអាចជម្រាបដំណឹងបាននៅពេលនោះទេ។
អង្គភាពសារព័ត៌មាននៅតែបន្តសាកសួរលោក សាញ់ មុនីរ័ត្ន ប្រធានមន្ទីរធនធានទឹក និងឧតុនិយមខេត្តកោះកុងខណៈដែលទូរសព្ទម្ដងជាពីរដងចូលហើយតែលោកមិនមានការឆ្លើយតបកាលពីល្ងាចថ្ងៃទី ៩ ខែកុម្ភៈឆ្នាំ២០២៥។
ជុំវិញសកម្មភាពនៃការយកអាចម៍ដីចាក់ក្រវ៉ាត់ព្រំតាមគម្រោងពាក្យថាការដ្ឋានជួសជុលទំនប់ទឹកប្រៃចម្ការលើ (ជំហាន១) ហាក់ដូចជាមិនស៊ីទៅនឹងទីតាំងដែលក្រសួងធនធានទឹក និងឧតុនិយម ផ្ដល់ជូន ព្រោះថាក្រវ៉ាត់ផ្លូវទាំងអស់នោះសុទ្ធសឹងតែជាការទន្ទ្រានចាក់ដីលើតំបន់អភិរក្សនៃជម្រកព្រៃលិចទឹកដៃមាត់សមុទ្រ មិនឃើញមានក្រវ៉ាត់ព្រំក្រវ៉ាត់ព្រំចាស់ណានោះឡើយ។
អ្នកខ្លះរិះគន់ចំៗថាគឺជាសកម្មភាពកន្ទាលធំបន្លំដេកទេដឹង។
រីឯអ្នកមួយចំនួនទៀតក៏និយាយថាបើមិនឃុបឃិតគ្នាដោយព័ន្ធដីតំបន់ដែនមាត់សមុទ្រនោះទេច្បាស់ណាស់នឹងអនុវត្តទៅតាមគំរោងដែលច្បាប់បានកំណត់ច្បាស់ស្ដីអំពីការគោរពតាមគោលការណ៍ច្បាប់ឆ្នាំ២០១៥៊ដោយមានខ្លឹមសារថា(តើត្រូវសង់សំណង់ចំងាយប៉ុន្មានពីមាត់ច្រាំង ឬឆ្នេរ ទើបស្របច្បាប់?
តាមអនុក្រឹត្យលេខ៩៨ អនក្រ.បក ចុះថ្ងៃទី២៤ ខែកក្កដា ឆ្នាំ២០១៥ ការកាន់កាប់ដីដែលជាប់តំបន់ច្រាំង ឬឆ្នេរ មិនខុសច្បាប់ទេ ប៉ុន្តែត្រូវកាន់កាប់ស្ថិតលើរយៈចម្ងាយតាមច្បាប់ដែលបានចែងដូចខាងក្រោម៖
ឆ្នេរ និងពាមសមុទ្រ៖ ចម្ងាយលើសពី១០០ ម៉ែត្រ គិតពីមាត់ឆ្នេរ និងមាត់ពាម (ពេលទឹកជោរអតិបរមា)
ចំពោះសាធារណជនក៏ដូចជាសង្គមស៊ីវិលនឹងតាមដានមើលថាតើការអនុវត្តចំពោះគម្រោងខាងលើនេះវាអាចចំណេញដល់ប្រជាពលរដ្ឋឬក៏ចំណេញទៅលើបុគ្គលដែលឃុបឃិតគ្នាជាប្រព័ន្ធលួចយកដីសហគមន៍របស់រដ្ឋចែកគ្នា ?
ទោះជាយ៉ាងណាក៏ដោយក្រោមកិច្ចការដឹកនាំដ៏ឈ្លាសវៃរបស់លោកជំទាវ មិថុនា ភូថង អភិបាលខេត្តកោះកុងលោកជំទាវនឹងមានការត្រួតពិនិត្យបន្ថែមទៀតលើការអនុវត្តចំពោះគម្រោងមួយនេះ ពិសេសថ្នាក់ដឹកនាំកំពូលៗមានសរស្ថាប័នពាក់ព័ន្ធសូមចាត់មន្ត្រីជំនាញរបស់ក្រសួងធ្វើការតាមដានស្រាវជ្រាវជុំវិញការលើកឡើងក៏ដូចជាសកម្មភាពជាក់ស្ដែងកំពុងតែមានបញ្ហាទាំងនេះអាចមិនប្រក្រតីណាមួយចៀសវាងការរិះគន់ជាសាធារណៈនាំឱ្យមានការបាត់បង់នូវសម្បត្តិធនធានធម្មជាតិរបស់រដ្ឋ ស្ថិតនៅក្នុងភូមិចំការលើ ឃុំថ្មស ស្រុកបូទុមសាគរ ខេត្តកោះកុងផងចុះ ថ្វីត្បិតតែមានការប្រជុំរវាងមន្ត្រីពាក់ព័ន្ធមួយចំនួនក្រោមរដ្ឋបាលមន្ទីកសិកម្ម រុក្ខប្រមាញ់ និងនេសាទ រដ្ឋបាលនៃមន្ទីធនធានទឹក និងឧតុនិយម និងក្រោមរដ្ឋបាលថ្នាក់ស្រុកបូទុមសាគរ ខេត្តកោះកុង កាលពីថ្ងៃទី៨ ខែមិនា ឆ្នាំ២០២៥។
សម្រាប់សារព័ត៌មានអ្វីយើងនៅតែបន្តរង់ចាំធ្វើការចុះផ្សាយជាបន្តបន្ទាប់បន្ថែមទៀតក្នុងករណីមានប្រភពព័ត៌មានផ្ដល់ជូនជាហូរហែរបន្តជម្រាបដំណឹងជូនទៅដល់រាជរដ្ឋាភិបាលក៏ដូចជាប្រជាពលរដ្ឋទូទៅ និងជាកញ្ចក់ឆ្លុះបញ្ចាំងអំពីទិដ្ឋភាពជាក់ស្ដែងក្នុងកិច្ចការចូលរួមចំណែកអភិវឌ្ឍន៍ជាតិកម្ពុជា។
